Gígjan landssamband íslenskra kvennakóra var stofnað 5. apríl 2003. Markmið með stofnun sambandsins er
að efla starfsemi og samstarf kvennakóra. Einnig að efla samskipti við kvennakóra erlendis og safna og
 miðla upplýsingum um starfsemi og sögu íslenskra kvennakóra.

Menningardagskrá Kvennakórs Garðabæjar verður haldin fimmtudaginn 25. október í Kirkjuhvoli, safnaðarheimili Vídalínskirkju í Garðabæ og hefst kl. 20. Þar stíga á stokk listamenn úr Garðabæ og bjóða upp á fjölbreytta dagskrá í tali og tónum.

Sú hefð hefur skapast að bæjarlistarmaður Garðabæjar mætir á Haustvöku kórsins og kynnir sig og verk sín. Að þessu sinni er það djasssöngkonan María Magnúsdóttir en hún hefur verið áberandi í íslensku tónlistarlífi sl. ár, bæði sem flytjandi og lagahöfundur. María mun syngja nokkur vel valin lög á vökunni en meðleikari hennar er Agnar Már Magnússon, píanóleikari.

Eyþór Eðvarðsson, ræðumaður kvöldsins, er stjórnendaþjálfari og ráðgjafi hjá Þekkingarmiðlun. Eyþór er með M.A. í vinnusálfræði og hefur birt fjölda greina í íslenskum og erlendum tímaritum, m.a. um tilfinningagreind, stjórnun, samskipti, breytingar, starfsánægju og vinnustaðarmenningu. Eyþór er þekktur fyrir skemmtilega og fræðandi fyrirlestra þar sem efnið er sett fram á sérlega grípandi hátt.

Það er einstaklega gaman og gefandi að fá að kynna framúrskarandi nemendur úr Tónlistarskóla Garðabæjar ár hvert. Að þessu sinni koma fram Auður Indriðadóttir, nemandi á framhaldsstigi í víóluleik og Guðmundur Steinn Markússon, nemandi á miðstigi í píanóleik.

Kvennakór Garðabæjar syngur bæði við upphafi og í lok dagskrár, fjölbreytt og létt lagaval.

Haustvakan er orðin fastur liður í menningarlífi bæjarins og er þetta átjánda árið sem Kvennakór Garðabæjar og Menningar- og safnanefnd Garðabæjar standa að dagskrá sem þessari. Kórkonum og stjórnandanum, Ingibjörgu Guðjónsdóttur, er það sérstakt ánægjuefni að geta lagt sitt af mörkum til blómlegra og betra menningarlífs í bænum. Haustvakan hefst kl. 20 og er aðgangseyrir 1800 kr. en innifalið í miðaverði er kaffi og kruðerí að hætti kórkvenna.

Vert er að benda á að árlegir aðventutónleikar kórsins verða þriðjudagskvöldið 4. desember í Digraneskirkju og hvetur kórinn fólk til að tryggja sér miða í tíma hjá kórkonum eða á kvennakorgb@gmail.com.

Fylgist með fréttum af Kvennakór Garðabæjar á facebook síðu kórsin: https://www.facebook.com/kvennakorgb
Einnig er hægt að horfa á upptökur af kórnum á YouTube: https://www.youtube.com/user/kvennakorgardabaejar
Lesa meira

Tónleikar Senjorítanna

Senjórítukórinn heldur hausttónleika sína í Seltjarnarneskirkju laugardaginn 27. október kl. 15. Á dagskrá eru létt og skemmtileg lög, íslensk og erlend, meðal annars eftir Jón Múla og Jónas Árnasyni, Braga Valdimar Skúlason, Sigfús Halldórsson, Magnús Eiríksson, Bjartmar Guðlaugsson, Irving Berlin og Abba. Aðgangur kostar 3000 kr. en það er frítt fyrir börn.
Í Senjórítukórnum eru um sjötíu konur á eftirlaunaaldri; stjórnandi þeirra er Ágota Joó. Á tónleikunum hafa þær með sér þriggja manna hljómsveit sem Vilberg Viggósson stjórnar.

Lesa meira

Af ást og öllu hjarta

Laugardaginn 27. október mun kvennakórinn Vox feminae halda tónleikana Af ást og öllu hjarta í Háteigskirkju. Kvennakórinn Vox feminae er 25 ára um þessar mundir og eru tónleikarnir liður í dagskrá afmælisárs Á efnisskrá eru verk eftir íslensk samtímatónskáld og er heiti tónleikanna tekið úr einu þeirra sem er eftir Svanfríði Hlín Gunnarsdóttur, en hún hefur samið þrjú verk sérstaklega fyrir kórinn og verða þau öll flutt á þessu afmælisári. Stjórnandi kórsins er Margrét J. Pálmadóttir. . Hægt er að nálgast miða hjá kórfélögum en einnig verða miðar seldir við inngang á tónleikadegi. Miðaverð er 2.000 krónur..

Lesa meira

Laugardaginn 20. október kl. 13 verður aðalfundur Gígjunnar haldinn í Söngskólanum Domus Vox, Laugavegi 116, Reykjavík.

Dagskrá aðalfundar:

1. Skýrsla stjórnar.
2. Reikningar.
3. Umræða um skýrslu og reikninga.
4. Tillögur og lagabreytingar.
5. Ákvörðun árgjalds.
6. Kosning formanns.
7. Kosning stjórnar og varamanna.
8. Kosning tveggja skoðunarmanna reikninga.
9. Önnur mál.


Aðildakórar Gígjunnar eru hvattir til þess að senda formann og stjórnir sínar á fundinn. Við viljum vekja athygli á að hver kór getur sent eins marga fulltrúa og hann vill á fundinn. Tveir fulltrúar hvers aðildarkórs hafa atkvæðisrétt á aðalfund skv. lögum Gígjunnar.

Einnig bráðvantar konur í stjórn Gígjunnar, tekið er á móti tilnefningum i gegn um netfang samtakanna. 


Hlökkum til að sjá sem flestar.

Með bestu kveðjum frá stjórn Gígjunnar:

Kolbrún, Kvennakór Reykjavíkur
Una Þórey, Kvennakór Akureyrar
Astrid, Kvennakór Reykjavíkur
Hólmfríður, Heklunum
Hanna, Kvennakór Hornafjarðar

Lesa meira