Heiðursviðurkenning 2010
Hrönn Hjaltadóttir, Kvennakór Reykjavíkur
Kvennakór Reykjavíkur vill tilnefna Hrönn Hjaltadóttur til heiðurstilnefningar Gígjunnar.
Hrönn var einn af stofnfélögum Kvennakórs Reykjavíkur og hefur verið félagi síðan. Hrönn hefur gegnt ýmsum embættum innan kórsins. Hrönn hefur verið í nótnanefnd, tónleikanefnd og útgáfunefnd og lengst af séð um allt nótnasafn kórsins, sem er orðið býsna stórt eftir nærri 20 ár.
Hún hefur í gegnum tíðina séð um allt prentað mál sem komið hefur frá kórnum, svo sem tónleikaskrár og skrár sem fylgja diskum. Alltaf er hægt að treysta því að þar sé allt unnið af stakri vandvirkni og heimildir séu réttar svo og allir textar. Hrönn hefur ekki getað sungið með kórnum í nokkur ár vegna sjúkdóms í raddböndum en hún er félagi í kórnum og gengur að öllum sínum skyldum innan hans.
Án hennar væri kórinn fátækari, hún er akkerið okkar.
Mynd: Hrönn Hjaltadóttir með heiðursviðurkenninguna ásamt Aðalheiði Ósk Gunnarsdóttur, formanni Gígjunnar.
Heiðursviðurkenning 2011
Sigurbjörg Aðalsteinsdóttir, Vox feminae
Kvennakórinn Vox feminae tilnefnir hér með Sigurbjörgu Aðalsteinsdóttur til heiðurstilnefningar Gígjunnar.
Sigurbjörg var í undirbúningshópi vegna stofnunar Kvennakórs Reykjavíkur og einn af stofnfélögum hans þegar kórinn var stofnaður árið 1993. Hún var ekki aðeins fyrsti formaður kórsins heldur kom að myndun hans, mótun og uppbyggingu.
Þegar slitnaði upp úr samstarfi Kvennakórs Reykjavíkur og hans kóra árið 2000, hélt Vox feminae áfram starfi sínu sem sjálfstæður kór og var Sigurbjörg fyrsti formaður hans og sinnti því starfi ötullega í sex ár.
Þá starfaði Sigurbjörg í stjórn Gígjunnar á fyrstu starfsárum hennar og tók þannig þátt í að móta það mikilvæga starf sem Gígjan sinnir.
Sigurbjörg hefur alla tíð verið metnaðarfull og framsýn og unnið gríðargott starf í þágu uppbyggingar kvennakóramenningar landsins.
Sigurbjörg hefur komið að ýmsum verkefnum innan kórsins og nú síðast var hún annar ritstjóri ljósmynda- og sögubókar Vox feminae “da capo” þar sem saga kórsins er rakin í máli og myndum auk hugleiðinga kórfélaga um þýðingu söngs í lífi þeirra. Bókin er þannig mikilvæg heimild um íslenskan kvennakór sem stofnaður var á síðustu öld og á án efa eftir að varpa ljósi á þann raunveruleika sem við nú búum við. Við grípum hér niður í hugleiðingu Sigurbjargar um kvennakórssöng úr bókinni da capo:
Fyrir margar okkar er fyrsta minningin um kvennakór tengd Kramhúsinu og kórskóla Margrétar J. Pálmadóttur. Sú látlausa auglýsing um kórskóla fyrir konur sem birtist í Morgunblaðinu í janúar 1992 leiddi okkur á fund hennar, á vit söngs með öðrum konum, á vit þeirra ævintýra sem óhjákvæmilega fylgdu í kjölfarið.
Í minningunni sitjum við flötum beinum í æfingasal í kjallara Kramhússins, í stuttu hléi frá söngnum, og Margrét segir... karlakórar hafa sungið hér í sjötíu ár: Eigum við ekki að stofna kvennakór, er ekki kominn tími til þess að stofnaður sé Kvennakór Reykjavíkur?
Í mínum huga var þessi hugmynd stórkostleg en glöðust var ég þó yfir því trausti og virðingu sem mér fannst hún sýna okkur. Sjálf vissi ég varla að til væri fyrirbærið kvennakór, og á örskotsstundu og eins og fyrir töfra, varð líf mitt og okkar allra litað af því, samtvinnað því og verður aldrei eins aftur. Síðan hefur margt gerst, við höfum orðið hluti af mjög lifandi og vel skipulagðri kvennahreyfingu. Við höfum átt þátt í skapa þá hreyfingu og skrifa kafla í íslenskri kvennasögu og tónlistarsögu, því á tæpum tveimur áratugum margfaldast fjöldi kvennakóra um landið allt, þeir stofna landssamtök, fá tónskáld til að semja verk fyrir nákvæmlega það hljóðfæri og ekki önnur, og kvennakórar öðlast viðurkenningu sem listrænt hljóðfæri.
Allt hefur þetta gerst og er að gerast fyrir tilverknað Margrétar, og í samvinnu hennar og annarra kvenna, sem deila hugmyndum, metnaði, sameinuðum vilja til góðra verka, og umfram allt ást á samhljómi kvenna.
Allt þetta er veganesti á vit nýrra ævintýra.
Mynd: Aðalheiður Ósk Gunnarsdóttir, formaður Gígjunnar, afhendir Sigurbjörgu Aðalsteinsdóttur heiðursviðurkenningu.
Heiðursviðurkenning 2012
Aðalheiður Ósk Gunnarsdóttir
Stjórn Kvennakórs Suðurnesja hefur ákveðið að tilnefna Aðalheiði Gunnarsdóttur.
Heiða, eins og við köllum hana, byrjaði í Kvennakór Suðurnesja haustið 1998. Árið 2000 var hún kosin í stjórn kórsins enda kom fljótt í ljós hversu dugleg hún er og vildi kórnum sínum allt hið besta. Hún sat í stjórninni til ársins 2005, þar af formaður kórsins frá 2001-2003. Hún var formaður kórsins þegar kórinn hélt Landsmót kvennakóra í Reykjanesbæ 3. - 5. maí 2002. Auk þessa hefur hún starfað í ýmsum nefndum innan kórsins, s.s. fjáröflunarnefnd og matarnefnd.
Einnig hefur Heiða sinnt ýmsum störfum fyrir kórinn eins og að útbúa tónleikaskrár og auglýsingar, semja fréttatilkynningar, hafa umsjón með heimasíðu kórsins og tengsl við fjölmiðla. Á síðasta aðalfundi okkar var hún titluð upplýsingafulltrúi kórsins og má segja að hún hafi verið í því hlutverki meira og minna í mörg ár þó að þessi titill hafi ekki fylgt fyrr en nú.
Heiða er alltaf tilbúin að leggja á sig aukavinnu fyrir kórinn og gerir það með glöðu geði. Hún er góður félagi og passar vel upp á konurnar í sinni rödd en hún er einmitt raddformaður í messó-röddinni. Hún lætur nýjar konur sitja við hlið sér og leiðir þær áfram fyrstu skrefin af einstakri ljúfmennsku.
Á formannafundi á Landsmóti kvennakóra í Reykjanesbæ árið 2002 var ákveðið að stofna landssamband kvennakóra og var stofnfundur Gígjunnar haldinn 5. apríl 2003. Kvennakór Suðurnesja var stofnfélagi í landssambandinu og var Heiða ásamt fleiri stjórnarkonum fulltrúi kórsins á stofnfundinum
(KKS átti fyrsta formann sambandsins, Guðrúnu Karlsdóttur). Heiða var í varastjórn Gígjunnar frá 2006 - 2008 og í aðalstjórn frá 2008 - 2011, þar af formaður frá 2009 - 2011. Hún hefur verið vefstjóri Gígjunnar frá 2010.
Það munar um svona konur eins og hana Heiðu okkar. Hún er okkur hinum góð fyrirmynd á svo margan máta. Þess vegna tilnefnum við hana.
Mynd: Aðalheiður Ósk Gunnarsdóttir með
heiðursviðurkenninguna.
Heiðursviðurkenning 2013
Gróa María Þorvaldsdsdóttir, Kvennakór Kópavogs
Kvennakór Kópavogs tilnefnir Gróu Maríu Þorvaldsdóttur til heiðursviðurkenningar Gígjunnar 2013.
Gróa María er einn af stofnfélögum og hefur starfað með Kvennakór Kópavogs frá 2002. Hún hefur verið virk í starfi kórsins frá upphafi og setið í stjórn og ýmsum nefndum hans og ávallt leyst mál kórsins á farsælan hátt. Gróa María ber með sér léttleika og jákvæðni sem nýtist vel í kórstarfinu og hefur unnið ötullega að farsæld og framgangi hans. Hún er einnig ein af þeim konum sem alltaf eru boðnar og búnar til að koma til aðstoðar þegar krefjandi verkefni kalla á aukavinnu.
Gróa María var einn hugmyndasmiða að styrktartónleikunum Hönd í Hönd sem kórinn hefur haldið fyrir Mæðrastyrksnefnd Kópavogs undanfarin fjögur ár. Þetta árið verða fimmtu tónleikarnir haldnir 3. nóvember. Hugmyndin að þessum tónleikum var bág staða margra fjölskyldna í kjölfar bankahrunsins 2008. Vildu kórkonur finna vettvang til að styðja við bæjarbúa í því erfiða ástandi sem skapaðist þá.
Á þessum árum hefur Kvennakór Kópavogs fengið til liðs við sig fjölmarga þekkta listamenn og hefur styrkur til Mæðrastyrksnefndarinnar verið álitlegur ár hvert. Það er ekki síst að þakka konum eins og Gróu Maríu en framlag hennar hefur haft mikil áhrif á hve vel heppnaðir þessir tónleikar hafa verið ár eftir ár.Stjórn Kvennakórs Kópavogs vill þakka Gróu Maríu fyrir þá velvild og umhyggju sem hún sýnir samfélaginu og fórnfúst og gott starf fyrir kórinn sinn.
Við viljum því leggja til að hún fái heiðursviðurkenningu Gígjunnar 2013.
Mynd: Anna Laxdal Þórólfsdóttir, formaður Gígjunnar, afhendir Gróu Maríu Þorvaldsdóttur heiðursviðurkenninguna.
Heiðursviðurkenning 2014
Sigríður Anna Ellerup, Vox feminae
Kvennakórinn Vox feminae tilnefnir hér með Sigríði Önnu Ellerup, eða Önnu Siggu, til heiðurstilnefningar Gígjunnar.
Anna Sigga var einn af stofnendum Kvennakórs Reykjavíkur og starfaði með kórnum frá stofnun hans í janúar 1993 fram til ársins 2000. Hún var formaður Kvennakórs Reykjavíkur frá 1997 - 1999 og vann að mörgum stórum verkefnum fyrir kórinn. Sem dæmi um verk hennar má nefna að hún vann að útgáfu fyrsta geisladisks kórsins, hún stýrði samningagerð við Karlakór Reykjavíkur og Reykjavíkurborg þegar Kvennakór Reykjavíkur fékk styrk til að eignast hluta í sönghúsinu Ými, og sat í undirbúningsnefnd fyrir Norrænt kvennakóramót árið 2000.
Hún gekk til liðs við Vox feminae 1998 og hefur starfað samfellt með kórnum síðan. Hún var formaður Vox feminae frá 2006 til 2012. Hún stýrði á þeim tíma afar metnaðarfullu starfi Vox feminae þar sem ráðist var í stór verkefni, svo sem útgáfu tveggja geisladiska, farið var í tónleikaferðir innanlands og utan, tónskáld fengin til að semja verk fyrir kórinn og ráðist í útgáfu ljósmynda- og sögubókar Vox feminae “da capo” í tilefni af 15 ára afmæli kórsins.
Anna Sigga var annar tveggja ritstjóra bókarinnar “da capo” þar sem saga kórsins er rakin í máli og myndum auk hugleiðinga kórfélaga um þýðingu söngs í lífi þeirra. Bókin er því mikilvæg heimild um íslenskan kvennakór sem stofnaður var á síðustu öld og á án efa eftir að varpa ljósi á þann raunveruleika sem við nú búum við.
Anna Sigga hefur skipulagt og tekið að sér fararstjórn í flestöllum utanlandsferðum Vox feminae frá upphafi og einnig Kvennakórs Reykjavíkur meðan hún starfaði þar. Einnig hefur hún verið fararstjóri í árlegum ferðum sönghússins Domus Vox til Ítalíu. Á Ítalíu hefur hún einnig aðstoðað aðra kóra eins og Stúlknakór Grindavíkur og Kvennakór Hafnarfjarðar á þeirra tónleikaferðum. Í öllum þessum ferðum hefur hún unnið fórnfúst starf, miðlað fróðleik og haldið utan um farþega af öryggi og umhyggju.
Anna Sigga hefur ávallt sýnt mjög mikinn metnað fyrir hönd starfs kvennakóra á Íslandi og hefur alltaf viljað veg þess sem mestan. Félagar í Vox feminae og öðrum kvenna- og stúlknakórum eiga henni mikið að þakka vegna hennar óeigingjarna starfs. Verkefni kórsins hafa ávallt verið í forgangi hjá henni og hún hefur verið öðrum kórfélögum bæði hvatning og fyrirmynd hvað varðar ástundun, þátttöku í uppbyggingu innra starfs með þátttöku í óteljandi nefndum og uppbyggingu á ímynd kórsins út á við.
Anna Sigga var fulltrúi Vox feminae í afmælisnefnd vegna 20 ára afmælis Kvennakórs Reykjavíkur árið 2013 þar sem þekking hennar á sögu kórsins frá stofnun hans skipti miklu máli, sem og víðsýni hennar.
Fyrst og fremst hefur Anna Sigga þó verið ótvíræður leiðtogi okkar kórfélaganna hin síðustu ár, þar sem hún hefur leitt hópinn með ljúfri lund og brosi á vör. Hún er glæsileg fyrirmynd annarra kórfélaga þegar kemur að elju, áhuga og metnaði fyrir hönd kórsins.
Það er sannfæring félaga í Vox feminae að engin væri betur að heiðursverðlaunum Gígjunnar komin en Sigríður Anna Ellerup.
Mynd: Sigríður Anna Ellerup með heiðursviðurkenninguna.
Heiðursviðurkenning 2015
Guðrún Ósk Sæmundsdóttir, Kvennakór Kópavogs
Kvennakór Kópavogs tilnefnir Guðrúnu Ósk Sæmundsdóttur - Rúnu.
Sumar manneskjur hafa eitthvað óútskýranlegt við sig, eru gleðigjafar sem lífga þannig upp á tilveruna að ef þær eru ekki nærri þá vantar eitthvað.
Í Kvennakór Kópavogs eru margar skemmtilegar og frábærar konur en hún Rúna okkar hefur þennan frábæra eiginleika og skiptir okkur kórsystur hennar og kórstarfið í heild sinni miklu. Hún í raun er stór hlekkur í stoðkerfi kórsins.
Rúna okkar er dásamleg og kemur okkur hinum alltaf öllum í gott skap með endalausu glensi sínu, athugasemdum og svipbrigðum. Alltaf fer hún fremst í flokki ef gera á eitthvað skemmtilegt, skvettist um og gerir endalaust grín að sjálfri sér sem hefur oft þær afleiðingar að allur kórinn endar í hláturskasti. Hún Rúna okkar er sú okkar sem tekur alltaf þemapartíin alla leið. Full ferðataska af hárkollum og búningum er tekin með í æfingabúðir og þar stekkur hún inn í gerfin eins og langlærður leikari og vekur alltaf mikla lukku fyrir.
Jákvæð er hún og alltaf til í að vinna fyrir kórinn, hún hefur setið í fleiri en einni stjórn og endalausum nefndum, ávallt viðbúin.
En til margra ára hefur hún einnig komið með "Rúnu söngte" á hverja æfingu. Rogast á hverja einustu æfingu með risa höldupoka af hitabrúsum sem innihalda göróttan engiferdrykk sem allar kórsysturnar (en við teljum hátt í 60) hópast um til að fá sopa af í æfingahléi. Þetta gerir hún allt af einskærri gleði og umhyggju fyrir okkur hinum.
Í kórum er mikilvægt að konur taki vel eftir á æfingum, mæti undirbúnar á æfingar, taki þátt í félagstarfi kórsins og svo framvegis. En í fjölbreyttum hópi frábærra kvenna leynast alltaf skrautfjaðrir og Rúna okkar er ein af þeim.
Við kórsystur Rúnu í Kvennakór Kópavogs erum alveg hreint endalaust þakklátar fyrir að fá að njóta samvista við hana í okkar frábæra kór. Því er það okkur mikill heiður og gleði að útnefna hana til heiðursviðurkenningar Gígjunnar.
Mynd: Guðrún Ósk Sæmundsdóttir ásamt Þórhildi Kristjánsdóttur, formanni Gígjunnar, sem afhenti henni heiðursviðurkenninguna.
Heiðursviðurkenning á landsmóti 2011-
Heiða Gunnarsdóttir
Heiða Gunnarsdóttir hefur aðstoðað Gígjuna í gegnum árin við vefsetrið. Hún hafði yfirumsjón með gerð þess eins og það er í dag. Hún sat í stjórn Gígjunnar frá 2004 til 2008 og var vefstjóri sambandsins í nokkur ár. Hún hefur mikinn áhuga á kvennakórastarfi og hefur ávallt verið tilbúin að aðstoða stjórn Gígjunnar þegar þess hefur verið óskað.
Heiða þakkaði kærlega fyrir sig og benti kórkonum á að vera duglegar að senda inn fréttir á vefsetur Gígjunnar og þá mega þær fréttir vera af öllu sem kórkonur eru að gera, meira að segja berjaferðir og þess háttar skemmtilegheit. Hún sagði líka frá því að vefsetrið yrði uppfært í haust. Einnig sagði hún svo skemmtilega frá því að dóttir hennar myndi örugglega koma til með að starfa fyrir Gígjuna.
Hún ætti bara eftir að eignast hana.
Heiðursviðurkenning á landsmóti 2011
Margrét Pálmadóttir
Margrét Pálmadóttir hefur unnið við áratuga uppbyggingarstarf í þágu kvennakóra. Upphafið að stofnun fjölda kvennakóra var að hún stofnaði kórskóla kvenna innan vébanda Kramhússins og rak hann þar í tvö ár. Þá strax varð til vísir að öflugu starfi kvennakóra landsins. Hún stofnaði Kvennakór Reykjavíkur sem varð fljótlega að öflugri kvennahreyfingu fjölbreytts tónlistarstarfs með konum á öllum aldri. Kórskóli, Senjórítur, Skemmtikór, Gospelsystur sem nú heita Cantabile og ýmis önnur starfsemi varð til í kringum þetta starf.
Árið 2000 stofnaði Margrét í félagi við aðra sönghús kvenna, Domus Vox, við Laugaveg í Reykjavík, sem sameinar undir einu þaki söngskóla og kórastarfsemi. Undir merkjum Domus Vox starfa nú tveir kvennakórar, Vox feminae og Cantabile ásamt Stúlknakór Reykjavíkur.
Margrét Pálmadóttir þakkaði Gígjunni kærlega fyrir þennan heiður sem henni var sýndur með þessari viðurkenningu.
Heiðursviðurkenning á landsmóti 2011
Margrét Bóasdóttir
Margrét Bóasdóttir er verndari Gígjunnar og hafa stjórnarkonur alltaf getað leitað til hennar með ýmis málefni og fengið góð ráð og leiðbeiningar. Hún hefur unnið ötullega með Gígjunni og var aðalhvatamaður að stofnun landssambandsins. Hún stóð fyrir fyrsta landsmóti kvennakóra í Ýdölum árið 1992 ásamt Kvennakórnum Lissý sem hún stjórnaði þá.
Hún hefur verið mótsstjóri á nokkrum landsmótum kvennakóra og verið mótshöldurum ómetanleg aðstoð enda hafsjór af reynslu og fróðleik.
Hún hefur stjórnað mörgum kórum á löngum og farsælum ferli og stjórnar nú Kvennakór við Háskóla Íslands.
Margrét Bóasdóttir þakkaði Gígjunni kærlega fyrir viðurkenninguna og var mjög ánægð með gripinn sem hún fékk.