Landssamband íslenskra Kvennakóra

Á nýju ári 2009 barst Tónverkasjóð Gígjunnar nýtt lag frá Hildigunni Rúnarsdóttir en stjórn sjóðsins fór þess á leit við hana að hún myndi semja lag fyrir sambandið í tilefni af Alþjóðlega kvennadeginum 8. mars 2009.

Lagið er samið við ljóðið Stökur eftir Lilju Sólveigu Kristjánsdóttur.

Allir formenn aðildarkóra Gígjunnar hafa fengið nótur af þessu nýja lagi sent til sín þannig að kórar geta nú hafið æfingar á laginu.

Gígjan og aðildarkórar hennar hafa frumflutningsrétt á laginu, ásamt einkaleyfi á flutningi og fjölföldun í tvö ár.

Stjórnin leggur það til að aðildarkórar flytji lagið á kvennadaginn 8. mars eða um þær mundir. Þeir sem ekki koma því við geta sungið lagið á öðrum tíma t.d. vortónleikum allt eftir því sem hentar hverjum kór. 

Hjá Kvennakór Garðabæjar eru æfingar hafnar af fullum krafti og mikill hugur í kórkonum að takast á við spennandi verkefni vorannar með hækkandi sól.

Sem fyrr stýrir sópransöngkonan Ingibjörg Guðjónsdóttir kórnum og píanóleikari er Sólveig Anna Jónsdóttir. Að venju er megináherslan lögð á undirbúning vortónleika sem haldnir verða í byrjun maí. Að þessu sinni einkennist efnisskráin af þjóðlögum frá ýmsum löndum og léttum kórverkum. Að auki eru fastir liðir á dagskrá vorannar, svo sem æfingabúðir í Skálholti í byrjun febrúar og þátttaka í guðsþjónustu í Vídalínskirkju á konudag, 22. febrúar. Mánuði síðar hyggjast kórkonur syngja fyrir íbúa Stykkishólms og nágrennis, og einnig fyrir eiginmenn sína, sem verða með í för. 

Húsfyllir var í Digraneskirkju á aðventutónleikum kórsins þann 8. desember síðast liðinn og rann allur ágóði þeirra tónleika til Garðabæjardeildar Rauða krossins. Nokkrir listamenn gengu til liðs við kórinn til þess að auka á fjölbreytni tónleikanna og gáfu þeir allir vinnu sína. Trompetleikararnir og feðgarnir Þorleikur Jóhannesson og Jóhannes Þorleiksson skreyttu jólalögin með hátíðlegum lúðrahljómi, djassbræðurnir Óskar og Ómar Guðjónssynir fluttu fallegt jólalag og léku einnig með kórnum í nokkrum lögum. Einsöngvarinn og söngneminn Sigríður Lárusdóttir söng einnig með kórnum. Öllu þessu listafólki þakkar kórinn af alhug. 

Haustönninni lauk síðan laust fyrir jól eða þann 18. desember en þá kom kórinn fram á tveimur stöðum. Á Vífilsstöðum söng kórinn jólalög fyrir dvalargesti og starfsfólk. Við það tækifæri var fulltrúum Garðabæjardeildar Rauða krossins afhentur ágóði aðventutónleikanna. Frá Vífilsstöðum héldu kór og kórstjóri, ásamt Ómari Guðjónssyni gítarleikara, í Jónshús í Garðabæ og komu þar fram á jólaskemmtun.

Kórastefna við Mývatn verður haldin í sjöunda sinn dagana 4.-7. júní 2009.

Í boði eru tvö verkefni; fyrir blandaða kóra og fyrir kvennakóra. Gert er ráð fyrir um 300-350 kórsöngvurum og hafa nú þegar rúmlega 100 manns staðfest þátttöku.

Kvennakórar munu æfa þýska tónlist, að hluta til með íslenskum texta, m.a. eftir Mendelssohn, Schubert og Brahms. Hluti verkanna verður fluttur með Sinfóníuhljómsveit Norðurlands. Stjórnandi er Friederike Woebcken, prófessor í kórstjórn við tónlistarháskólann í Bremen og stjórnandi Madrigalakórsins í Kiel. 

Nú þegar hafa Kvennakór Suðurnesja og Kvennakór Hafnarfjarðar sýnt áhuga, auk Kvennakórs Reykjavíkur sem hefur staðfest þátttöku.

Blandaðir kórar munu æfa og flytja Messu í As dúr eftir Franz Schubert, ásamt fjórum einsöngvurum og Sinfóníuhljómsveit Norðurlands. Stjórnandi er Guðmundur Óli Gunnarsson. Messan er 47 mín. löng og með mjög fallegum laglínum eins og Schubert er von og vísa. 

Tónastöðin mun panta nótur eins og þarf og möguleiki verður að fá geisladiska hjá undirritaðri þar sem hver kórrödd er innspiluð. 

Allir þátttökukórar syngja einnig eigin efnisskrá á tónleikum á fimmtudagskvöld eða föstudagskvöld eftir samkomulagi.  

Verið hjartanlega velkomin á Kórastefnu við Mývatn 2009. 

Allar nánari upplýsingar veitir undirrituð,

Margrét Bóasdóttir
netfang: margretbo(hjá)korastefna.is
sími: 897 4731 

Sjá frekari upplýsingar á vefsetri Kórastefnunnar

Jólin 2008
Elskulegu söngsystur,
Óskum ykkur öllum til sjávar og sveita, gleðilegra jóla og farsældar á nýju ári. Þökkum sérstaklega samveruna á landsmóti íslenskra kvennakóra í apríl síðastliðinn.
Jólakveðja,
Kvennakór Hornafjarðar
Ragnheiður Rafnsdóttir formaður