Landssamband íslenskra Kvennakóra

Það var árla dags þann 8. júní síðast liðinn þegar um 50 manna hópur á vegum Jórukórsins á Selfossi hélt af stað í söngferðalag til Danmerkur og Svíþjóðar. Í þessari frétt er hægt að lesa allt um þetta velheppnaða tónleikaferðalag Jórukórsins.Ferðasaga frá Jórukórnum á Selfossi
Það var mjög árla dags þann 8. júní síðast liðinn þegar um 50 manna hópur á vegum Jórukórsins hélt af stað í söngferðalag til Danmerkur og Svíþjóðar. Þarna voru á ferð tæplega 40 Jórur, ásamt Hlín Pétursdóttur stjórnanda kórsins og pínaóleikurunum Þórlaugu Bjarnadóttur og Stefáni Þorleifssyni. Einnig var með í för einvala stuðningslið sem saman stóð af góðum hóp eiginmanna kórkvenna. Undirbúningur fyrir þessa ferð hafði staðið yfir allan veturinn með ýmsum hætti. Afla þurfti fjár til ferðarinnar og var það gert með því að halda flóamarkaði bæði vor og haust, þúsundir trjáplantna voru gróðursettar fyrir Skógræktina og leitað var eftir stuðningi hjá ýmsum velunnurum kórsins og sendum við þeim okkar bestu þakkir. Ekki var nóg að afla bara fjár til ferðarinnar, einnig þurfti að þjálfa sönginn vel og var því sungið við hin ýmsu tækifæri allan veturinn en kórinn tók þátt í alls átta tónleikum. Eftir allan þennan söng töldum við Jórur að nú væri ekkert því til fyrirstöðu að halda í víking og leyfa nágrönnum okkar í Danmörku og Svíþjóð að kynnast okkar íslensku sönghefð. Í Kaupmannahöfn tók á móti okkur Íslenski kvennakórinn sem þar er starfandi, en stjórnandi hans er Sigríður Eyþórsdóttir. Þessi dansk-íslenski kvennakór er lítill en ákaflega skemmtilegur kór sem hefur starfað í 10 ár. Við Jórur hittum þær á Landsmóti kvennakóra í Hafnafirði vorið 2005 og fljótlega eftir það kom sú hugmynd að heimsækja þær og halda með þeim sameiginlega tónleika. Þetta varð að veruleika á heitum sunnudegi þann 10. júní 2007 í Frihavnskirken í Kaupmannahöfn. Tónleikarnir tókust vel, kirkjan sérstaklega falleg í síðdegissólinni og hljómurinn frábær. Kórarnir sungu hvor sína efnisskrá en einnig voru sameiginleg lög. Við sem sungum áttum alveg yndislega stund sem við vonum að hafi einnig skilað sér til tónleikagesta. Á eftir var sameiginlegur kvöldverður hjá kórunum í safnaðarheimili kirkjunnar og varð úr því ákaflega skemmtileg kvöldstund. Á þriðjudeginum 12. júní var síðan haldið yfir Eyrarsundið til Lundar í Svíþjóð þar sem seinni tónleikar ferðarinnar voru haldnir. Þar sungum við í Klausturkirkjunni í Lundi sem einnig er falleg kirkja en samt mjög ólík kirkjunni í Kaupmannahöfn, bæði hvað varðar útlit og hljóm. Þessa tónleika héldum við Jórur einar og var það ógleymanleg stund að syngja í þessari kirkju sem ber þess merki að hafa tilheyrt klaustri, ekki mjög stór en látlaus og með miklum hljóm. Eftir tónleika var kórnum boðið í garðveislu hjá sænskum kóráhugamanni að nafni Mikael Karlberg. Tilkoma þessa rausnarlega boðs er að Mikael, sem er læknir og prófessor, hefur mikinn áhuga á tónlist og þá sérstaklega söng. Þar sem hann er einnig samstarfsmaður Einars Jóns eiginmanns Hlínar stjórnanda, þá fékk hann spurnir af því síðla vetrar að þessi íslenski kvennakór væri væntanlegur til Lundar. Í framhaldi af því ákvað hann að bjóða öllum hópnum í grillveislu. Þetta tókst alveg einstaklega vel, við íslendingarnir fengum að njóta þess að borða úti á hlýju sumarkvöldi og sendum við Mikael og konu hans innilegar þakkir fyrir frábærar móttökur. Ekki var nú bara sungið í þessari ferð, ýmislegt fleira var gert. Farið var í Kristjaníu og snæddum við kvöldverð á þessum sérstaka stað, söguslóðir Íslendinga í Kaupmannahöfn voru þræddar með Guðlaugi Arasyni rithöfundi. Einnig var farið í skoðunarferð yfir til Svíþjóðar þar sem margir skemmtilegir staðir á Suður-Skáni voru skoðaðir. Síðasta daginn var síðan keyrt með Guðlaugi Arasyni um Sjáland. Farið var í Hróarskeldu og einnig til Sorö þar sem Jónas Hallgrímsson skáld dvaldi árin 1843-44. Í Sorö samdi Jónas meðal annars hið þekkta ljóð Ég bið að heilsa og einnig Dalvísu sem var á efnisskrá kórsins. Að sjálfsögðu tók kórinn lagið í Sorö og voru þessi ljóð sungin. Okkur Jórum langar að þakka öllum þeim sem studdu við bakið á okkar varðandi þessa ferð. Í kórstarfi eins og okkar er nauðsynlegt að takast á við ný verkefni sem efla og styrkja kórinn. Með kveðju frá Jórukórnum

Næstkomandi föstudag og laugardag 19. og 20. október heldur Jórukórinn sinn árlega flóamarkað í Tryggvaskála á Selfossi. Margt eigulegra muna verður á boðstólum; smátt og stórt, mjúkt og hart, skart og skraut, skæði og klæði, bækur og blöð, plötur og diskar, nýtt og notað. Allt á mjög hóflegu verði. Einnig verða heimabakaðar kökur og annað ljúfmeti til sölu ásamt kaffi og nýbökuðum vöfflum með rjóma. Á föstudag verður opið frá kl. 14.00 til 19.00 og laugardag frá kl. 10.00 til 17.00. Flóamarkaðurinn er aðal fjáröflun kórsins og vonast Jórurnar eftir því að sem flestir noti þetta tækifæri til að gera góð kaup á skemmtilegum markaði, sem fyrir löngu er orðinn fastur liður í bæjarlífinu á Selfossi.

Laugardaginn 20. október kl. 16-18 verður framhaldsaðalfundur Gígjunnar haldinn í Söngskólanum Domus Vox, Laugavegi 116, 105 Reykjavík. Aðildarkórar Gígjunnar eru hvattir til þess að senda formann og stjórnir sínar á fundinn. Við viljum vekja sérstaka athygli á því að á þessum fundi stendur til að breyta lögum Gígjunnar og getur hver kór sent eins marga fulltrúa og hann vill. Hver kór fer með tvö atkvæði á fundinum. Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína til fundarins.Dagskrá framhaldsaðalfundar verður sem hér segir
1. Skýrsla formanns. 2. Reikningar Gígjunnar. 3. Styrkir vegna ferða á stjórnarfundi. 4. Lagabreytingar. 5. Upprifjun frá síðasta landsmóti í Hafnarfirði 2005. 6. Kynning á landsmótinu á Hornafirði 25. - 27. apríl 2008. 7. Kynning á kvennakóramóti í Noregi 10. - 13. apríl 2008. 8. Önnur mál.

Haustvaka, hinn árlegi menningarviðburður í Garðabæ, verður haldin sjöunda árið í röð fimmtudaginn 11. október kl. 20.00 í Kirkjuhvoli. Á Haustvökunni stígur á stokk hópur listamanna sem tengjast Garðabæ á einn eða annan hátt. Kvennakór Garðabæjar syngur undir stjórn Ingibjargar Guðjónsdóttur og verða fyrir valinu íslensk sönglög við ljóð Jónasar Hallgrímssonar. Á boðstólum verða léttar veitingar. Aðgangseyrir er 1500 kr. en 1200 kr. fyrir lífeyrisþega. Verið hjartanlega velkomin!Fréttatilkynning frá Kvennakór Garðabæjar
Haustvaka, hinn árlegi menningarviðburður í Garðabæ, verður haldin sjöunda árið í röð fimmtudaginn 11. október kl. 20.00 í Kirkjuhvoli. Á Haustvökunni stígur á stokk hópur listamanna sem tengjast Garðabæ á einn eða annan hátt. Líkt og áður mun Kristín Helga Gunnarsdóttir rithöfundur stjórna kvöldinu af sinni alkunnu snilld. Karl Ágúst Úlfsson leikari og núverandi bæjarlistamaður Garðabæjar hefur tekið að sér að lesa gestum pistilinn! Alma Guðmundsdóttir og Klara Ósk Elíasdóttir úr sönghópnum Nylon flytja nokkur lög og einnig leikur Berglind Bergmann nemandi í píanóleik við Tónlistarskóla Garðabæjar fyrir gesti. Að sjálfsögðu mun Kvennakór Garðabæjar syngja undir stjórn Ingibjargar Guðjónsdóttur og verða fyrir valinu íslensk sönglög við ljóð Jónasar Hallgrímssonar í tilefni af 200 ára fæðingarafmæli skáldsins. Píanóleikari er Sólveig Anna Jónsdóttir. Á boðstólum verða léttar veitingar að hætti kórkvenna en ætíð hefur náðst að skapa sannkallaða kaffihúsastemmningu. Aðgangseyrir er 1500 kr. en 1200 kr. fyrir lífeyrisþega. Gestum er ráðlagt að mæta tímanlega því undanfarin ár hefur aðsóknin verið það mikil að færri hafa komist að en vilja. Verið hjartanlega velkomin! Kvennakór Garðabæjar og menningar- og safnanefnd bæjarins standa að Haustvökunni. Á síðasta ári skrifaði kvennakórinn undir samstarfssamning við Garðabæ til þriggja ára og er Haustvakan hluti af þeim samningi. Kvennakór Garðabæjar heldur uppi glæsilegri heimasíðu, http://www.kvennakor.is/ þar sem lesa má um Haustvökuna og aðra starfsemi kórsins.