Landssamband íslenskra Kvennakóra

Í vetur bregður Kvennakór Reykjavíkur út af vana sínum og heldur nýárstónleika í stað jólatónleika. Laugardaginn 16. janúar mun kórinn halda tvenna tónleika sem verða í Tjarnarbíói kl. 16:00 og kl. 20:00. Þar mun kórinn fagna nýju ári með flutningi á fagurrri tónlist í anda nýársgleðinnar. Upphafin verður dívan sem býr innra með öllum konum og sungið verður meðal annars um Dóná svo bláa, staldrað við í Brúðkaupi Fígarós, hjá hinni blóðheitu Carmen og einnig hjá Kátu ekkjunni. Einnig verður sungið um ástina, draumaprinsa og dramatík og ættu flestir að þekkja vel valin lög á dagskránni, en þar eru perlur eftir m.a. Adele, Queen, Ennio Morricone, Arthur Hamilton og fleiri. Stjórnandi kórsins er Ágota Joó og undirleik og hljómsveitarstjórn annast Vilberg Viggósson.   Við bjóðum vini og velunnara hjartanlega velkomna á tónleikana og bendum á að best er að fá miða hjá kórkonum sjálfum eða með því að senda tölvupóst á netfangið postur@kvennakorinn.is. Miðaverð í forsölu er kr. 3.000 en við innganginn kostar miðinn kr. 3.500.

Gígjan, landssamband íslenskra kvennakóra, óskar félögum í aðildarkórum sambandsins gleðilegra jóla, blessunar og friðar með þökk fyrir samstarfið á árinu sem er að líða. 

Megi nýja árið verða gott til handa kvennakórum landsins og starf þeirra vaxa og dafna með hækkandi sól.

Hátíð í bæ, hátíðartónleikar til styrktar Hjartagátt Landspítalans verða haldnir í Fríkirkjunni í Reykjavík í hádeginu fimmtudaginn 17. desember. Á tónleikunum koma fram einsöngvararnir Sigrún Hjálmtýsdóttir, Einar Clausen og Valgerður Guðnadóttir ásamt sjö manna hljómsveit og kvennakórnum Heklunum.

Stjórnandi er Lilja Eggertsdóttir. Á efnisskránni eru lög úr ýmsum áttum.

Tónleikarnir hefjast kl. 12 og taka tæpa klukkustund.

Miðaverð er 2.500 kr. Ath. að ekki er tekið við greiðslukortum.

Kórar undir stjórn Margrétar J. Pálmadóttur, Stúlknakór Reykjavíkur, AURORA, Vox feminae, Cantabile og Hrynjandi, halda sína árlegu aðventutónleika í Hallgrímskirkju miðvikudaginn 16. desember næstkomandi. Tónleikarnir bera yfirskriftina „Englaraddir óma“ og þar munu koma fram yfir 200 söngkonur á öllum aldri.

Tónleikarnir eru helgaðir trúarlegri tónlist frá ýmsum tímum tileinkuð aðventu og jólum. Efnisskráin er fjölbreytt, en þar er meðal annars að finna verk eftir Biebl og Mendelsohn, í bland við jólalög sem allir þekkja og elska. Gestir á tónleikunum verða Hanna Björk Guðjónsdóttir, sópran ásamt hljóðfæraleikunum Antoniu Hevesi, Elísabetu Waage, Eydísi Fransdóttur og Viktoriu Tsvetaeva.

Það verður hátíðleg stemming í Hallgrímskirkju á þessum tónleikum og því er tilvalið að koma og hlýða á jólalög við kertaljós í hinum undurfagra hljómi og notalega umhverfi Hallgrímskirkju.