Landssamband íslenskra Kvennakóra

Æfingar hjá Kvennakór Kópavogs eru að hefjast aftur eftir gott sumarfrí. Ýmislegt skemmtilegt er á dagskrá vetrar; Hönd í hönd, jólasöngur, æfingabúðir, vortónleikar...og síðast en ekkí síst, söngferð til Ítalíu!   Kórkonur eru að venju spenntar fyrir komandi vetri og vilja gjarnan fá fleiri söngkonur til liðs við sig, æfingar eru á þriðjudagskvöldum kl. 19:15-21:30.   Allar áhugasamar söngskvísur eru boðnar velkomnar á opna æfingu sem verður í Snælandsskóla 8. september kl. 19:15.   Við hlökkum til að sjá ykkur!

Kvennakórinn Ljósbrá í Rangárþingi auglýsir eftir kórstjóra fyrir komandi vetur. Nánari upplýsingar um starfið má nálgast hjá formanni kórsins, Olgu í síma 892 5357.

Konur og karlar með tónlistarmenntun sem hafa áhuga á að stjórna skemmtilegum og metnaðarfullum kvennakór eru hvött til að senda inn umsókn á olga@ss.is.

Nú er að koma að vortónleikum Kvennakórs Akureyrar og að þessu sinni er yfirskrift þeirra "Dívur og drottningar".

Á efnisskránni eru að stórum hluta lög eftir konur og lög sem konur hafa gert fræg. Þannig feta kórkonur í fótspor Adele, Whitney Houston, Dolly Parton og fleiri góðra kvenna. Efnisskráin er mjög fjölbreytt, allt frá kafla úr sálumessu að popplögum og sungið er á latínu, ítölsku, finnsku, ensku og íslensku.

Gestasöngvarar verða Þórhildur Örvarsdóttir og Ívar Helgason, en úr kórnum syngur Halla Jónsdóttir einsöng.

Undirleikarar eru Aladár Rácz á píanó og Pétur Ingólfsson á bassa og stjórnandi er Daníel Þorsteinsson.

Tónleikarnir verða haldnir á annan í hvítasunnu, mánudaginn 25. maí í Hömrum í Hofi kl. 15:00.

Miðasala er í Menningarhúsinu Hofi og á midi.is og verðið er 3000 kr.

Kvennakór Suðurnesja heldur vortónleika í Bíósal Duushúsa mánudaginn 18. maí og miðvikudaginn 20. maí kl. 20:00. Efnisskráin er fjölbreytt og skemmtileg en á henni má finna mambó, tangó, djass, ensk og amerísk þjóðlög og íslensk dægurlög.

Stjórnandi kórsins er Dagný Þórunn Jónsdóttir. Hljóðfæraleikarar eru Geirþrúður Fanney Bogadóttir á píanó og Birna Rúnarsdóttir á þverflautu.

Kórkonur héldu til Minneapolis í Bandaríkjunum síðasta haust og tóku þátt í Hátíð Leifs Eiríkssonar sem er samnorræn menningarhátíð, en mikið af innflytjendum frá öllum Norðurlöndum búa á svæðinu. Þar flutti kórinn íslenska tónlist; þjóðlög, dægurlög o.fl. Nú skiptir kórinn um gír, að vísu fá nokkur íslensk lög að fljóta með í byrjun auk þess sem þjóðlög og dægurlög frá Bretlandi og Ameríku verða flutt. Á seinni hluta tónleikanna tekur síðan við suðræn sveifla með mambó og tangó.

Miðaverð er kr. 2.500 við innganginn en kr. 2.000 í forsölu. Miðasala er hjá kórfélögum, á kvennakorsudurnesja@gmail.com og við innganginn.