Landssamband íslenskra Kvennakóra

Miðvikudaginn 13. maí 2015 stendur kvennakórinn Vox feminae fyrir vortónleikum í Seltjarnarneskirkju sem bera nafnið Vorkveðja.   Starfsár Vox feminae hefur verið einkar fjölbreytt þar sem kórinn var meðal annars í samstarfi við Reykjavík Barrokk við flutning verksins Gloria eftir Vivaldi. Þá frumflutti Vox feminae verkið Gloria eftir Mist Þorkelsdóttur á Háskólatónleikum í mars síðastliðnum. Einnig var kórinn í samstarfi við aðra kóra sönghússins Domus Vox á tónleikum á sumardaginn fyrsta sem hétu Konur í 100 ár, Slétt og brugðið, og voru tileinkaðir 100 ára afmæli kosningarréttar kvenna.    Á tónleikunum 13. maí nk. verða flutt íslensk söng- og þjóðlög eftir m.a. Jórunni Viðar, Pál Ísólfsson og Inga T. Lárusson.    Tónleikarnir hefjast kl. 20:30 og eru undir stjórn Margrétar J. Pálmadóttur. Píanóleikari tónleikanna er meðstjórnandi kórsins Guðný Einarsdóttir.

Sunnudaginn 10. maí næst komandi mun Kvennakór Garðabæjar halda sérstaka afmælistónleika í tilefni af því að 15 ár eru frá stofnun kórsins.

Tónleikarnir verða í Guðríðarkirkju og hefjast kl. 16.00.

Strengjatríó leikur með Kvennakór Garðabæjar
Efnisskrá tónleikanna verður, að vanda, einkar fjölbreytt þar sem flutt verða klassísk verk í bland við léttari tónsmíðar. Í nokkrum verkanna leikur strengjatríó með kórnum, skipað þeim Hlín Erlendsdóttur, fiðluleikara, Herdísi Önnu Jónsdóttur, víóluleikara og Helgu Björgu Ágústsdóttur, sellóleikara en píanóleikari kórsins er Sólveig Anna Jónsdóttir.

 
Eldri kórfélagar taka lagið
Í tilefni að þessum merku tímamótum munu um þrjátíu fyrrverandi kórkonur sameinast kórnum í nokkrum lögum en þau lög hafa verið á efnisskrá kórsins jafnt og þétt frá stofnun.

„Já mig langaði til þess að nota þetta tækifæri til að sameina núverandi og fyrrverandi kórkonur í söng og leik og ljúka þannig með táknrænum hætti fimmtán skemmtilegum árum í söng og leik með frábærum konum. Rúmlega þrjátíu konur hafa þegar boðað komu sína svo þetta verður einstök stund í Guðríðarkirkju og hlökkum við mikið til” segir Ingibjörg Guðjónsdóttir, kórstjóri.

Ingibjörgu Guðjónsdóttir sópransöngkona,
stofnandi og stjórnandi Kvennakórs Garðabæjar


Miðasalan er hafin
Tónleikarnir verða eins og áður sagði í Guðríðarkirkju, Kirkjustétt 8 í Grafarholti og hefjast þeir kl. 16:00. Miðaverð í forsölu er 2500 krónur og er miðasala hjá kórkonum og á netfanginu kvennakorgb@gmail.com. Aðgöngumiðar verða seldir við innganginn á 3000 krónur meðan húsrúm leyfir.

Kaffi og kruðerí
Að venju bjóða kórkonur tónleikagestum upp á kaffi og kruðerí að tónleikum loknum.

„Sú skemmtilega hefð hefur skapast síðustu ár að bjóða tónleikagestum upp á kaffi og eitthvað sætt með’í í safnaðarsal kirkjunnar. Þessari samverustund vilja kórkonur alls ekki sleppa því ekkert er betra en að fá að deila með sínum nánustu þeirri góðu tilfinningu sem fylgir því að “uppskera eins og maður sáir” enda liggur mikil og gleðileg vinna að baki tónleikum sem þessum” segir Ingibjörg kórstjóri að lokum.

 Kvennakór Garðabæjar á 15 ára afmælisárinu

 

Þú finnur frekari upplýsingar um Kvennakór Garðabæjar á Facebook síðu kórsins: https://www.facebook.com/kvennakorgb

Kvennakórinn Seljur verður með vortónleika í Seljakirkju laugardaginn 9. maí kl. 16:00. 

Vorið er í algleymingi hjá Seljunum þetta árið, enda veitir ekki af að kalla á það. Efnisskráin er fjölbreytt og skemmtileg, þar er m.a. Ríó Tríó lagasyrpa sem Aðalheiður Þorsteinsdóttir hefur útsett fyrir kórinn.

Hljóðfæraleikarar með kórnum verða Arnhildur Valgarðsdóttir á píanó, Matthías Stefánsson fiðlu- og gítarleikari og Birgir Bragason á kontrabassa. Kórstjórn er að vanda í höndum Svövu Kristínar Ingólfsdóttur söngkonu, auk þess sem hún syngur einsöng með kórnum. 

Kórinn hefur stækkað í vetur og telur nú um 35 konur sem hafa æft saman í vetur. Seljurnar þakka þeim sem styrkt hafa starfsemi kórsins og bjóða alla velkomna á ákall til vorsins.

Aðgangseyrir er 1.500 kr. en frítt fyrir 15 ára og yngri.

Léttsveitin var stofnuð þann 19. september 1995 og heldur því upp á 20 ára afmæli sitt á þessu ári. Hátíðartónleikar í tilefni afmælisins verða haldnir í Silfurbergi í Hörpu þann 9. maí kl. 16:00.

Léttsveitin mun að vanda slá á létta strengi og flytja dægurlög sem hafa verið vinsæl á Íslandi í gegnum tíðina. Á dagskránni eru einnig lög sem fyrrum kórstjóri Léttsveitarinnar, Jóhanna V. Þórhallsdóttir, samdi fyrir kórinn. Í hópi annarra lagahöfunda eru m.a. Magnús Eiríksson, Sinéad O´Connor, Paul Simon, Bragi Valdimar Skúlason og Tómas R. Einarsson.

Hljómsveitina sem spilar með kórnum skipa þau Ásgeir Ásgeirsson gítarleikari, Gunnar Hrafnsson bassaleikari, Eric Quick trommuleikari og Kjartan Guðnason slagverksleikari ásamt hljómsveitarstjóranum og píanóleikaranum Aðalheiði Þorsteinsdóttur.

Stjórnandi er Gísli Magna.