Landssamband íslenskra Kvennakóra

Vortónleikar Kvennakórs Garðabæjar verða haldnir sunnudaginn 29. apríl kl. 20 í Hafnarborg, menningar- og listamiðstöð Hafnarfjarðar.

Tónleikarnir marka upphaf söngferðalags sem hefst á Íslandi og lýkur í Kanada. 1. maí leggur Kvennakór Garðabæjar land undir fót og heldur til Vancouver á kórahátíðina Tapestry International. Á hátíðinni mun kórinn, líkt og á tónleikunum, flytja íslensk tónverk ásamt vel völdum verkum frá hinum Norðurlöndunum. Erlendu tónverkin tengjast ekki öll nágrannaþjóðum okkar heldur bjóðum við jafnframt upp á efnisskrá með tónlist frá Kanada, Bandaríkjunum og fjarlægari þjóðum svo sem Afríku og Haiti.

Frumflutt verður tónverkið Eldar eftir Báru Grímsdóttur, tónskáld. Það er Kvennakór Garðabæjar mikill heiður að flytja þetta stórbrotna kvennakóraverk. Í verkinu túlkar Bára í tónum, texta og hrynjanda, Skaftáreldana er mörkuðu upphaf móðuharðindanna. Kvennakór Garðabæjar þakkar Báru fyrir samstarfið og einstakt framlag hennar til tónlistarlífs í landinu.

Kórstjóri er Ingibjörg Guðjónsdóttir og píanóleikari Sólveig Anna Jónsdóttir.

Miðaverð í forsölu er 2.500 kr. og við innganginn 3.000 kr.

Hægt er að fylgjast með ferðum Kvennakórs Garðabæjar á fésbókarsíðu kórsins: https://www.facebook.com/kvennakorgb/

Kvennakórinn Heklurnar í Mosfellsbæ eiga 15 ára afmæli á þessu ári.

Af því tilefni halda þær tónleika í Guðríðarkirkju þriðjudaginn 1. maí klukkan 17:00.

Yfirskrift tónleikanna er „Ástir og örlög“ þar sem Heklurnar munu syngja lög sem hafa fylgt kórnum í gegnum tíðina og hann hefur tekið ástfóstri við. Á efniskránni eru m.a. Stingum af eftir Mugison, Draumalandið eftir Sigfús Einarsson, Vikivaki Valgeirs Guðjónssonar auk fleiri sígildra dægurlaga, ættjarðarlaga og nokkurra þjóðlaga.

Nýr stjórnandi kórsins er Dagný Jónsdóttir og meðleikari á tónleikunum er Kristján Karl Bragason.

Kvennakórinn Heklurnar var stofnaður árið 2003 og hefur það að markmiði að vera „kórinn sem bakar ekki“, þar sem í upphafi var ákveðið að standa ekki fyrir neinum fjáröflunum til að standa straum af kostnaði við að halda kórnum gangandi. Kórinn æfir einu sinni í viku í Varmárskóla.

Kórinn er á leið í afmælisferð til Ungverjalands 10. mai nk. og mun halda eina tónleika í kirkju í borginni Kecskemét. Þar tekur á móti kórnum ungverskur kvennakór og hitar upp fyrir tónleikana þeirra.

Freyjukórinn heldur tónleika með kaffihúsaívafi fimmtudaginn 26. apríl kl. 20:30 í Logalandi. Ásamt kórnum mun Sirkus Ísland stíga á stokk með sín frábæru sirkusatriði. Að vanda verður lagaval fjölbreytt undir styrkri stjórn Viðars Guðmundssonar. Undirleikarar eru Borgfirðingarnir Birgir Þórisson á píanó, Ingi Björn Róbertsson á trommur og Skagamaðurinn Sigurþór Þorgilsson á bassa. Einsöngur er í höndum Barböru Guðbjartsdóttur.

Miðaverð er kr. 3.000 og er innifalið í því kræsingar af hlaðborði. Húsið opnar kl. 20:00 og hefjast tónleikarnir kl. 20:30.

Kvennakór Hafnarfjarðar heldur vortónleika í Hásölum fimmtudaginn 26. apríl kl. 20:00. Tónleikarnir bera yfirskriftina Blærinn faðmar bæinn sem er tilvitnun í hið fallega ljóð Böðvars Guðmundssonar, Fylgd, en leiðir jafnframt huga kórkvenna að heimabæ kórsins, Hafnarfirði. Dagskrá tónleikanna er fjölbreytt og sett saman af metnaði. Flutt verða lög af ýmsu tagi víða að úr heiminum og mun kórinn syngja söngleikja- og kvikmyndatónlist í bland við hefðbundnari kórverk. Stjórnandi Kvennakórs Hafnarfjarðar er Erna Guðmundsdóttir en hljóðfæraleikarar á tónleikunum verða Antonía Hevesi sem leikur á píanó, Jóhann Hjörleifsson á slagverk og Jón Rafnsson á bassa. Einsöngvarar á tónleikunum verða úr röðum kórkvenna. Miðar verða seldir hjá kórkonum og við innganginn. Miðaverð er 2.500 kr. og er frítt fyrir börn 12 ára og yngri. Tónleikagestum verður boðið upp á kaffi og konfekt í tónleikahléi.