Landssamband íslenskra Kvennakóra

Kvennakór Hafnarfjarðar heldur tónleika í Víðistaðakirkju fimmtudaginn 16. nóvember kl. 20:00. Gestir tónleikanna verða Kór Öldutúnsskóla og Brynhildur Auðbjargardóttir, stjórnandi kórsins.

Tónleikarnir fara fram á degi íslenskrar tungu og bera yfirskriftina Ástkæra, ylhýra. Á efnisskránni verða íslensk þjóðlög ásamt lögum eftir Atla Heimi Sveinsson, Jón Ásgeirsson og fleiri íslensk tónskáld. Sem dæmi um ljóðahöfunda má nefna Halldór Laxness, Davíð Stefánsson, Olgu Guðrúnu Árnadóttur og Káin. Í stuttu máli má segja að yrkisefnið í ljóðunum sem kórinn flytur séu bernskan, lífið og tilveran.

Stjórnandi Kvennakórs Hafnarfjarðar er Erna Guðmundsdóttir og píanóleikari er Antonía Hevesi. Stjórnandi Kórs Öldutúnsskóla er Brynhildur Auðbjargardóttir.

Miðasala á tónleikana fer fram hjá kórkonum og við innganginn og er miðaverð 2.500 kr. Einnig má senda tölvupóst á kvennakor.hafnarfjardar@gmail.com eða skilaboð á Facebook síðu kórsins. Ókeypis er fyrir börn 12 ára og yngri. Ekkert hlé verður á tónleikunum en boðið verður upp á kaffi og konfekt að þeim loknum.

Senjórítukórinn heldur hausttónleika sína í Seltjarnaneskirkju á kjördag, 28. október, kl. 16. Á efnisskrá eru ljúf lög eins og Berðu mitt ljóð, Ég mun bíða þín, Fyrsta ástin, Þín innsta þrá og Án þín; dillandi fjörug lög eins og Sway, Bíllinn minn og ég, Lady Fish and Chips, Sólskinið í Dakóta og Vorkvöld í Reykjavík og heil syrpa af ABBA-lögum. Stjórnandi er goðsögnin Ágota Joó og með kórnum leikur Vilberg Viggósson og hljómsveit. Aðgöngumiðinn er á 2500kr. Frítt fyrir börn undir 14 ára.

Hér með er boðað til aðalfundar Gígjunnar 2017.

Laugardaginn 21. október kl. 14 verður aðalfundur Gígjunnar haldinn í Söngskólanum Domus Vox, Laugavegi 116, Reykjavík.

Dagskrá aðalfundar:

 Skýrsla stjórnar.

1. Reikningar
2. Umræða um skýrslu og reikninga.
3. Tillögur og lagabreytingar.
4. Ákvörðun árgjalds.
5. Kosning formanns.
6. Kosning stjórnar og varamanna.
7. Kosning tveggja skoðunarmanna reikninga.
8. Önnur mál.

Lagabreytingar og aðrar tillögur frá aðildakórunum skulu berast stjórn eigi síðan en tveimur vikum fyrir aðalfund.

Aðildakórar Gígjunnar eru hvattir til þess að senda formann og stjórnir sínar á fundinn. Við viljum vekja athygli á að hver kór getur sent eins marga fulltrúa og hann vill á fundinn. Tveir fulltrúar hvers aðildarkórs hafa atkvæðisrétt á aðalfund skv. lögum Gígjunnar.

Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína. Aðildarkórar eru einnig hvattir til að koma með tillögur að lagabreytingum. Breytingartillögur þurfa að berast eigi síðar en tveimur vikum fyrir fundinn þannig að hægt sé að kynna þær fyrir öðrum kórum með tölvupósti. Vinsamlegast sendið allar tillögur eða hugmyndir að lagabreytingum á netfangið  gigjan2003@gmail.comfyrir laugardaginn 7.október.

Hlökkum til að sjá sem flestar.

Með bestu kveðjum frá stjórn Gígjunnar:

Bryndís, Kvennakór Hornafjarðar
Kolbrún, Kvennakór Reykjavíkur
Guðlaug, Heklunum
Una Þórey, Kvennakór Akureyrar
Petra, Kyrjunum

Nýtt starfsár er að byrja hjá okkur í Heklunum. 
Æfingar hefjast þriðjudaginn 5. september í sal Varmárskóla, Mosfellbæ klukkan 19.30. Framundan er skemmtilegur og spennandi vetur undir stjórn Dagnýjar Jónsdóttur. Dagný hefur stjórnað Kvennakór Suðurnesja í meira en áratug en er nýtekin við sem stjórnandi Heklanna. 
Kórinn verður 15 ára á næsta ári og af því tilefni er stefnt að því að ferðast út fyrir landsteinana.
Áhugasamar konur eru velkomnar í kórinn.
Endilega hafið samband hér á vefsíðunni eða sendið póst á netfangið heklurnar@gmail.com
Opin æfing verður 19. september sem verður augýst nánar síðar.
Nánari upplýsingar er hægt að fá hjá Guðlaugu Ásgeirsdóttur formanni kórsins S: 8463761